នំអន្សមយក្សត្រៀមបំបែកឯកគ្គទកម្មពិភពលោក

01/01/2018
ប្រភព : ពត៏មានបែបពិចារណារ

សៀមរាប៖ នៅឆ្នាំនេះ នំអន្សមយក្ស ត្រូវបានរៀបចំ និងសម្រិតសម្រាំងខ្ពស់។ ស្តង់ដានៃការរៀបចំចំអិនខ្ពស់ជាងឆ្នាំទៅ ធ្វើឲ្យអ្នករៀបចំរំពឹងថា នំអន្សមឆ្នាំនេះ អាចធានាគុណភាពរបស់ខ្លួនបានយូរ។ លើសពីនេះទៀត នៅឆ្នាំនេះនំអន្សមយក្ស ដែលមានទម្ងន់ជាង៣តោន ក៏ត្រៀមខ្លួន ក្នុងការបំបែកឯកគ្គទកម្មពិភពលោកផង ដោយក្នុងនោះ ក្រុមការងារនៃកំណត់ត្រាពិភពលោក ឫ World Guinness Record នឹងចុះមកពិនិត្យស្តង់ដា ដើម្បីផ្តល់កំណត់ត្រាពិភពលោក ដល់នំអន្សមយក្សរបស់ខ្មែរ។

ពិធីក្រុងពាលីបែបសាសនារបស់នំអន្សមយក្ស បានចាប់ផ្តើមហើយនៅព្រឹកថ្ងៃសុក្រនេះ។ ក្រុមការងារនៃសមាគមចុងភៅកម្ពុជា ដែលមានសមាជិកចំនួន១០០នាក់ បានរួសរាន់ ញាប់ដៃញាប់ជើង ដើម្បីចំអិននំអន្សមយក្ស ដែលមានទម្ងន់ ៣,២០០តោន ហើយក៏ជានំអន្សមដំបូង ដែលនឹងចូលទៅក្នុងកំណត់ត្រាពិភពលោកផងដែរ។

អនុប្រធាននៃសមាគមចុងភៅកម្ពុជា បានឲ្យដឹងថា ការវេចនំអន្សមយក្សអាចនឹងចាប់ផ្តើមនៅម៉ោងប្រមាណ៤រសៀលថ្ងៃនេះ បន្ទាប់ពីការរៀបចំទៅតាមផ្នែកមួយៗរួចរាល់ហើយនោះ។ ផ្នែកជំនាញមួយៗ ដែលលោក ឡុង បូរ៉ា ចង់បញ្ជាក់ក្នុងប្រតិបត្តិការណ៍ធ្វើនំអន្សមនេះ រួមមាន ក្រុមធ្វើចំណងស្លឹកចេក ក្រុមជូតស្លឹកចេក ពូតខ្ទិះដូង ដាំសណ្តែកបាយ ចំអិនសាច់ជ្រូក ដាំបាយដំណើប និងចុងក្រោយ គឺដល់ក្រុមវេចនំអន្សមនោះ។

បទពិសោធន៍ពីឆ្នាំទៅ និងការរៀបចំបច្ចេកទេសគ្រប់គ្រាន់នៅឆ្នាំនេះ ធ្វើឲ្យលោក ឡុង បូរ៉ា ជឿជាក់ថា នំអន្សមយក្ស មានគុណភាពល្អ និងអាចធានាគុណភាពបានយូរជាងឆ្នាំទៅផងដែរ។ លោក បូរ៉ា ពន្យល់ថា៖« ឆ្នាំមុនយើងបានដឹងពីចំណុចខ្សោយរបស់នំអន្សម។ ដោយឡែកឆ្នាំនេះ យើងបានត្រៀមលក្ខណៈ និងបច្ចេកទេសគ្រប់គ្រាន់ ក្នុងការវេចនំអន្សមយក្សនេះ។ យើងបានចែកក្រុមជំនាញមួយៗ ការធ្វើពុម្ពចំអិនមូល ហើយយើងនឹងចំអិនគ្រឿងផ្សំ ឲ្យឆ្អិនក្នុងពេលតែមួយ»។

នៅឆ្នាំនេះ នំអន្សមយក្ស ក៏បានស្នើចុះបញ្ជីក្នុងកំណត់ត្រាពិភពលោកផងដែរ។ នៅល្ងាចថ្ងៃទី១៣ ក្រុមការងារនៃកំណត់ត្រាពិភពលោក នឹងចុះមកត្រួតពិនិត្យ ទាំងស្តង់ដាចំអិន និងទំហំ ដែលសមាគមចុងភៅបានសន្យា។ ចំពោះលទ្ធផល ធ្វើឡើងនៅល្ងាចថ្ងៃទី១៣ នៅទីលានជល់ដំរីតែម្តង។

នៅឆ្នាំនេះ ចំការណាយសម្រាប់នំអន្សមយក្សមានរហូតដល់ទៅជាង២ម៉ឺនដុល្លារ។ សាធារណជនមួយចំនួនរិះគន់ថា ការចំណាយទាំងនេះ មានភាពខ្ទះខ្ទាយ។ ចំណុចនេះ លោក ឡុង បូរ៉ា ពន្យល់ថា៖« បើយើងយកលុយទាំងនេះទៅជួយកុមារ ឫមន្ទីរពេទ្យណាមួយ វាបានតែមួយភ្លែតទេ តែសម្រាប់ការធ្វើនំអន្សមនេះ គឺជាមុខមាត់របស់ប្រទេសជាតិយើង។ នំអន្សមគឺជានំរបស់ខ្មែរ។ មានទេសចរច្រើនណាស់ ដែលគាត់នឹងមកចូលរួមក្នុងព្រឹត្តិការណ៍អង្គរសង្ក្រាន្ត។ វាគឺជាមោទនភាពរបស់ខ្មែរយើង ដែលមាននំអន្សមយក្ស ដែលប្រទេសជិតខាងមិនទាន់មានដូចយើង»។

គួរបញ្ជាក់ថា នំអន្សមយក្ស មានទម្ងន់ជាង៣តោន ដែលមានមុខកាត់១ម៉ែត្រ និងបណ្តាយ៥ម៉ែត្រ។ ពិធីដង្ហែទៅទីតាំងបង្ហាញមុខទីលានជល់ដំរី ធ្វើឡើងនៅល្ងាចថ្ងៃទី១៣ មេសា។ នៅព្រឹកថ្ងៃ១៤ ដែលជាថ្ងៃចាប់ផ្តើមនៃព្រឹត្តិការណ៍អង្គរសង្ក្រាន្ត ពិធីសម្ពោធកាត់នំអន្សមយក្យ ក៏មានការចូលរួមពីប្រមុខរដ្ឋាភិបាលកម្ពុជាផងដែរ៕

ចុះឈ្មោះដោយឥតគិតថ្លៃ!

ចុះឈ្មោះចូលរួមបំបែកឯតទគ្គកម្មពិភពលោក តាមរយៈការត្បាញក្រមាដែរវែងជាងគេទាំងអស់គ្នា!!

ព័ត៌មានលម្អិត